Fréttir

Nú er fjölbreytt og skemmtileg vika að baki í skólanum okkar. Allir bekkir eru búnir að fara í frábærar haustferðir þar sem veðrið lék við fólk og ekki annað að sjá og heyra en að allir hafi haft gagn og gaman af. Í dag héldum við upp á dag íslenskrar náttúru sem er dagsettur 16. september ár hvert. Vinabekkirnir (1. og 6. bekkur, 2. og 7. bekkur o.s.frv.) fóru saman út og leystu verkefni sem gekk út á að finna hlut í náttúrunni sem byrjaði á hverjum staf í stafrófinu, t.d. g sem gat þá verið gras, r sem gat verið reynitré o.s.frv. Enn og aftur lék veðrið við okkur og áttu vinabekkirnir saman góða stund þar sem þeir eldri gátu m.a. hjálpað þeim yngri. Nýbyggingin er alltaf að taka á sig betri og betri mynd. Nú hafa líka verið að koma inn ný húsgögn og gaman að sjá hvað skólinn okkar er smátt og smátt að breytast til betri vegar. Leiksvæðið er enn í vinnslu. Það væsir þó ekkert um börnin í frímínútum og nóg að gera. Já, það eru spennandi tímar framundan í leik og starfi. Njótið helgarinnar!

Það var ánægjulegt að fá árganga '74-'78 í heimsókn í Grunnskólann Hellu í dag, 3. september. Margar góðar minningar voru ræddar á rölti um skólann og virtist félagslífið í diskóherberginu (stofa 3) standa þar uppúr.Þau höfðu líka gaman af því að skoða viðbygginguna og nefndu einhverjir að það væri nú kannski bara spennandi að hefja skólagöngu á ný. Við þökkum þessum flotta hópi kærlega fyrir komuna.